本地化的综合资讯_搜罗天下热点信息

宅在家中过新年高登巴丝解闷攻略

时间:2020-07-03  作者:
宅在家中过新年高登巴丝解闷攻略

乜而家仲有人去拜年㗎咩?难得放几日假,留喺屋企做自己锺意做嘅事好过啦!身为高登巴丝,梗係喺屋企上高登、开部PS4打机、再唔係整盒模型砌吓咁啦!如果通通都唔啱仲可以煲吓高登神剧,配搭同早餐茶餐常餐一样咁千变万化。我哋会同大家介绍最啱用嚟谋杀假期嘅解闷活动,适合选择困难病患者服用。

先睇吓有咩game值得玩,都要预时间买架嘛!首先係PS Plus会员一月免费下载嘅《Alienation》,呢只game玩法够简单,就係四个人合作打外星生物。因为唔会射到队友,宝物亦係各自各,绝对唔会有Team Kill或者斗抢宝物嘅情况出现;而且本身有番咁上下难度,好多时真係要齐四支枪先够打,刺激得嚟唔伤和气,年初三赤口都啱玩。讲开PS Plus,其实今个月佢仲有其他好玩嘅免费game,例如《Tales of Zestiria - Digital Edition》,喺新春期间有特别追加。惊玩唔晒不妨照下载,之后慢慢玩都未迟。

想玩大作,今个新年不得不提《Resident Evil 7》。新一集重拾恐怖感觉,啱啲锺意官能刺激嘅朋友玩。虽然成只game同上三代好唔同,但据讲係咁多集以来恐怖气氛最强嘅一集,加上PS4版支援PSVR,刚好买咗玩起嚟感觉自然更正!

新年流流唔想吓亲,有只《Kingdom Hearts HD 2.8 - Final Chapter Prologue》畀你拣。佢係一只由Square Enix同迪士尼合作推出嘅ARPG,玩起嚟当然冇咁刺激,但喺入面你既可以《FF》系列嘅MK角色,亦可以拣迪士尼嗰几位传统卡通人物作战,见到只米奇老鼠拎住条大锁匙去殴人,都咪话唔过瘾。加上拎咗以前有故事关连嘅三集做HD重製合辑,内容庞大,打足成个新年假都未必玩得完。

宅在家中过新年高登巴丝解闷攻略
◆ Alienation宅在家中过新年高登巴丝解闷攻略
◆ Resident Evil 7宅在家中过新年高登巴丝解闷攻略
◆ Kingdom Hearts HD 2.8 - Final Chapter Prologue

打机唔啱你,又或者唔想成个假期斋打机咁闷,不如买番一两盒模型砌啦。砌完唔止有成功感,之后仲有实物畀你玩,既然係农曆新年,一于拣两件红色模型应节。

如果砌模型技术一般,打算素组又希望靓,RG系列嘅新安洲就啱晒你。RG系列本身就设计得精细又高可动性,更重要係佢本身部件分色整得好仔细,任何一只RG只要素组、简单咁划下线已经唔差。呢只红噹噹嘅新安洲不但有镀金件,主体红色装甲喷上光泽红,砌出嚟就好似上过色咁。虽然因为大只,价钱比其他RG贵,但砌完之后你会觉得值回票价。

嫌RG太细只?咁简单砌唔耐?不如拣呢盒大洋肠渣古MG版Psycho Zaku ver. Ka.。一睇到Ver. Ka.就知佢外型设计有一定保证,成个机体同我哋一般见到嘅渣古好唔同,当大暗藏好多故事入面独有嘅元素,唔会因为砌过其他渣古觉得闷。另外,佢最大卖点係背脊有大大支能量棒同一大排大砲,净係呢几碌嘢都玩你一两日。如果你打算又打磨又喷油,应该够玩成个假期。嫌麻烦想只睇不砌,讨论区就有巴打砌紧,不妨直接过去睇睇。

宅在家中过新年高登巴丝解闷攻略
◆ MG版Psycho Zaku ver. Ka.宅在家中过新年高登巴丝解闷攻略
◆ 新安洲

唔锺意打机,又唔想费神砌模型嘅朋友可以选择煲剧睇片,一样消磨时间,悠闲地度过新年。

《新福尔摩斯》第四季上星期啱啱播完,按传统继续得三集,每集个零钟,一个下昼煲晒话咁易。第四季三集主题围绕两位主角嘅亲情线,华生遭逢巨变,事件对福尔摩斯同华生都有好大冲击,两个人嘅关係亦渐趋紧张。剧情有意寻求突破,两人演技依然出色,但坊间反应似乎冇上几季咁正面,尤其最尾全体出动嘅镜头好有TVB胶剧结局feel,追开嘅朋友点都照睇埋佢。如果未睇过嘅,由头开始煲唔会令你失望,话晒係高登神剧之一。想摷番第1至3季嚟睇其实唔难,上Netflix登记个帐户就睇到,首个月免费,兼且随时都cut得

懒得追番上N季剧情嘅朋友,新系列剧集首推《怪奇物语》,故事涉及恐怖怪物同政府参与嘅邪恶实验,呢类题材一向极具追看性,加上几位童星演技出色,形象亦讨人欢喜。剧中小孩之间纯真友谊、年轻男女嘅叛逆狂傲,以至及父母对儿女深刻感情,令《怪奇物语》比其他解谜冒险作品更具魅力。

不过《怪奇物语》首播至今约有半年时间,可能唔少人经已睇咗,咁可以追另一套Netflix剧《尼蒙利斯连环不幸事件》,剧集1月13日至成套上架,新鲜滚热辣。同名电影曾经喺2004年上映,由占基利主演。故事讲述三个孤儿喺父母死后,阻止远房亲戚兼监护人欧拉夫伯爵向丰厚遗产打主意,佢哋不单要识破欧拉夫嘅诡计同揭穿佢嘅各种掩饰伪装,仲要调查父母离奇死亡嘅真相。剧集适合小朋友收看,新年一家大细睇最啱。

宅在家中过新年高登巴丝解闷攻略
◆ 新福尔摩斯宅在家中过新年高登巴丝解闷攻略
◆ 怪奇物语宅在家中过新年高登巴丝解闷攻略
◆ 尼蒙利斯连环不幸事件

至于各位想按传统应节,开电视睇第200次《家有囍事》嘅朋友恐怕要失望喇,今年TVB翡翠台凌晨决定重播剧集《一屋老友记》,仲要好多时一晚播足5集。即使年三十晚至初三某几日翡翠台或J5安排播贺岁片,但早段係播《我爱HK喜上加囍》、《百星酒店》等「极品」,要到两三点先重播《逃学威龙三之龙过鸡年》同《大内密探零零发》。星期六大年初一下昼大台会播《赌城风云》,大家可以专心拜年/打麻雀/玩鱼虾蟹。

如果你锺意「无定向」咁睇片,打机直播、贺岁片、cult片、经典电影、日韩综艺节目乜都啱,咁就可以上直播台睇吓有乜好嘢,即使套片可能你已经睇过,但睇直播胜在有班人喺chat room陪住你边吹水边睇,观感完全唔同㗎。

宅在家中过新年高登巴丝解闷攻略
◆ 一屋老友记晚晚陪住大家,好感动宅在家中过新年高登巴丝解闷攻略
◆ 直播台大把嘢睇


上一篇: 下一篇:

相关阅读